På sorteringsbandet vårt i Saunesmarka jobbar tilsette kvar dag med å sortere plastemballasjesekkar for seg, og papp og papir for seg.
Dette er ein viktig jobb – for papp er ikkje berre papp, og papir er heller ikkje berre papir.
Takk vere dei som jobbar her får vi:
- Super kvalitet til resirkulering
- Betre betalt for papiret vi sender frå oss
- Spart endå fleire tre
Men innimellom dukkar det opp ting som aldri burde vere i ein papirdunk eller i ein plastemballasjesekk. Ein gjengangar er sprøytespissar.
Fleire gongar i året må tilsette til legevakta for å sjekke seg for hepatitt og HIV etter å ha stukke seg på ein bortkomen sprøytespiss.
Slik kastar du sprøyter på rett måte:
- Du kan kaste sprøytespissar i restavfallet. Pakk dei godt inn – for eksempel i papir, tørkepapir eller samle opp fleire i ei tom plastflaske / syltetøyglas som du kastar i restavfallet.
- Har du mange sprøytespissar, kan du kjøpe ein gul boks for smittefarleg avfall (50 l) frå SSR. Vi køyrer rute med smittefarleg avfall siste fredagen i månaden mot betaling. Ta kontakt på post@reinhaldsverket.no eller 70 00 70 50 når boksen din er full.
Takk for at du viser omsyn – og kastar rett! Det kan førebyggje skadar og gjere kvardagen tryggare for dei som sorterer avfallet vårt.
